ПРАВІЛЫ
экскурсійнага абслугоўвання

  1. АГУЛЬНЫЯ ПАЛАЖЭННІ

    1. "Правілы экскурсійнага абслугоўвання" (далей Правілы) распрацаваны ў адпаведнасці з існуючым заканадаўствам Рэспублікі Беларусь, Статутам ДУ "Нацыянальная бібліятэка Беларусі" і рэгламентуюць парадак экскурсійнага абслугоўвання наведвальнікаў Нацыянальнай бібліятэкі Беларусі (далей Бібліятэка) у складзе экскурсійнай групы.
    2. Права наведвання Бібліятэкі ў складзе экскурсійнай групы прадастаўляецца кожнаму грамадзяніну. Дзеці да 14 гадоў дапускаюцца на экскурсію толькі ў суправаджэнні дарослых.
    3. Экскурсійнае абслугоўванне ажыццяўляецца на платнай аснове (па наяўнаму і безнаяўнаму разліку).
    4. Экскурсійнае абслугоўванне на бясплатнай аснове ажыццяўляецца для дзяцей дашкольнага ўзросту, дзяцей-сірот, інвалідаў І і ІІ груп, ветэранаў Вялікай Айчыннай вайны пры наяўнасці пацвярджаючых дакументаў.
    5. Дакументамі, якія даюць права арганізаванай групе на экскурсійнае абслугоўванне з'яўляюцца пропуск наведвальніка сацыякультурнага цэнтра і касавы чэк.
    6. Экскурсійныя группы фарміруюцца па заяўках індывідуальных наведвальнікаў і калектыўных заяўках.
    7. Экскурсійнае абслугоўванне ажыццяўляецца толькі супрацоўнікамі Нацыянальнай бібліятэкі Беларусі.

  2. АРГАНІЗАЦЫЯ ЭКСКУРСІЙНАГА АБСЛУГОЎВАННЯ

    8. Экскурсійныя групы па заяўках індывідуальных наведвальнікаў фарміруюцца па папярэдняму запісу з 20 чысла кожнага месяца на наступны месяц. Заяўкі на экскурсіі прымаюцца: аўторак - субота з 10.00 да 18.00.
        Афармленне экскурсійных груп, сфарміраваных па заяўках індывідуальных наведвальнікаў, спыняецца за 5 хвілін да пачатку экскурсіі.
    9. Экскурсійнае абслугоўванне сфарміраваных груп праводзіцца ў наступным рэжыме:
    аўторак, серада, пятніца - 12.00, 15.00, 18.00;
    чацвер, субота - 12.00, 15.00, 17.00;
    нядзеля (акрамя ліпеня - жніўня) - 12.00, 15.00, 17.00;
    выхадны - панядзелак.
    Летні графік работы:
    аўторак, серада, пятніца - 12.00, 15.00, 18.00;
    чацвер, субота - 12.00, 15.00, 17.00;
    панядзелак (01.07-31.08) - 13.00, 15.00, 17.00
    выхадны - нядзеля.
    10. На экскурсійнае абслугоўванне прымаюцца калектыўныя заяўкі ад груп наступных катэгорый насельніцтва:
          школьнікі (з 12 год) ;
          навучэнцы прафесiянальна-тэхнiчных вучылiшч, сярэдне-спецыяльных навучальных устаноў, студэнты вышэйшых навучальных утаноў;
          супрацоўнiкi прадпрыемстваў, арганiзацый i iншых устаноў;
          групы замежных грамадзян;
          турыстычныя групы.
    11. Ад турыстычных арганізацый прымаецца не больш дзвюх заявак у месяц. Колькасны склад турыстычнай групы не павінен перавышаць 50 чалавек.
    12. Папярэдні запіс калектыўных заявак ажыццяўляецца з 5 чысла кожнага месяца на наступны месяц. У выпадку, калi гэта чысло прыпадае на нядзелю цi святочны дзень, запіс ажыццяўляецца наступным дзнем гэтага месяца. Дата і час правядзення экскурсii могуць быць зменены не пазней, чым за 7 дзён да правядзення экскурсіі i толькі пры наяўнасці вольнага ў гэты час супрацоўнiка сектара экскурсійнай работы аддзела сувязей з грамадскасцю.
        Калектыўныя заяўкі на экскурсіі прымаюцца: аўторак - субота з 10.00 да 18.00.
    13. Колькасны склад экскурсійнай групы - да 15 чалавек, у тым ліку 1 (адзін) суправаджальны для груп школьнікаў, навучэнцаў, студэнтаў.
    14. У выключных выпадках з'яўляецца дапушчальным перавышэнне колькаснага складу групы больш, чым на 5 чалавек. У гэтым выпадку афармляецца дадатковая экскурсія пры ўмове наяўнасці вольнага ў гэты час супрацоўніка сектара экскурсійнай работы аддзела сувязей з грамадскасцю. У адваротным выпадку экскурсанты, якія перавышаюць колькасны склад групы, набываюць білеты індывідуальнага наведвальніка.
    15. У выпадку:
    15.1 прыбыцця групы раней вызначанага часу, датэрміновае абслугоўванне ажыццяўляецца пры наяўнасці вольнага ў гэты час супрацоўніка сектара экскурсійнай работы аддзела сувязей з грамадскасцю;
    15.2 спазнення групы менш, чым на 30 хвілін, час правядзення экскурсіі скарачаецца суразмерна часу спазнення;
    15.3 спазнення групы больш, чым на 30 хвілін, абслугоўванне адмяняецца ў аднабаковым парадку.

  3. ПРАВЫ НАВЕДВАЛЬНІКАЎ

    16. Наведвальнікі маюць права:
    16.1 атрымліваць неабходную інфармацыю аб экскурсійных паслугах;
    16.2 карыстацца паслугамі экскурсаводаў;
    16.3 выкарыстоўваць фота-, відэаапаратуру пры наяўнасці касавага чэка, які пацвярджае аплату гэтай паслугі;
    16.4 звяртацца да кіраўніцтва Бібліятэкі па пытаннях, звязаных з арганізацыяй экскурсійнага абслугоўвання.

  4. АБАВЯЗКІ НАВЕДВАЛЬНІКАЎ

    17. Наведвальнікі абавязаны:
    17.1 выконваць правілы экскурсійнага абслугоўвання Бібліятэкі;
    17.2 здаваць у гардэроб верхнюю вопратку;
    17.3 пакідаць у камеры захоўвання сумкі, папкі, партфелі, непразрыстыя пакеты, футляры з музычнымі інструментамі, парасоны і іншыя рэчы;
    17.4 беражліва адносіцца да маёмасці Бібліятэкі;
    17.5 захоўваць цішыню, парадак, чысціню ў памяшканнях і на тэрыторыі Бібліятэкі;
    17.6 ветліва адносіцца да экскурсаводаў і наведвальнікаў Бібліятэкі;
    17.7 у надзвычайных абставінах (пажар, аварыя, пагроза тэрарыстычнага акта і г.д.) выконваць патрабаванні супрацоўнікаў Бібліятэкі, органаў унутранных спраў і пажарнай бяспекі.
    18. Наведвальнікам забараняецца:
    18.1 парушаць нормы грамадскіх паводзін;
    18.2 уносіць у Бібліятэку друкаваныя матэрыялы, дакументы на электронных і іншых носьбітах, рэжучыя інструменты без узгаднення з адміністрацыяй Бібліятэкі;
    18.3 уваходзіць у Бібліятэку з жывёламі;
    18.4 выконваць дзеянні, якія наносяць шкоду абсталяванню Бібліятэкі;
    18.5 выносіць рэчы і дакументы з Бібліятэкі;
    18.6 карыстацца сродкамі мабільнай сувязі з уключаным гукавым сігналам;
    18.7 карыстацца фота-, відэаапаратурай без наяўнасці касавага чэка;
    18.8 самавольна размяшчаць у памяшканнях Бібліятэкі аб'явы, афішы і іншыя матэрыялы, займацца камерцыйнай дзейнасцю;
    18.9 прыходзіць ў стане, які не адпавядае правілам санітарнай і асабістай гігіены, а таксама ў нецвярозым стане або пад уздзеяннем наркатычных сродкаў.

  5. АДКАЗНАСЦЬ НАВЕДВАЛЬНІКАЎ

    19. За пашкоджанне маёмасці Бібліятэкі, несанкцыянаваны вынас дакументаў, абсталявання і іншых рэчаў, якія належаць Бібліятэцы наведвальнікі нясуць адміністратыўную, маёмасную і іншую адказнасць, якая прадугледжана заканадаўствам Рэспублікі Беларусь.
    20. Наведвальнікі, якія парушалі Правілы экскурсійнага абслугоўвання, могуць быць пазбаўлены права наведваць Бібліятэку на час, вызначаны адміністрацыяй Бібліятэкі.

  6. ПРАВЫ БІБЛІЯТЭКІ

    21. Бібліятэка мае права:
    21.1 уносіць дапаўненні і змяненні ў Правілы;
    21.2 вызначаць умовы экскурсійнага наведвання;
    21.3 аказваць экскурсійныя паслугі, пералік і цэны якіх вызначаюцца Бібілятэкай па ўзгадненню з Міністэрствам культуры Рэспублікі Беларусь;
    21.4 прымаць меры па кампенсацыі страты, нанесенай наведвальнікамі Бібліятэкі, у адпаведнасці з заканадаўствам Рэспублікі Беларусь;
    21.5 вызначаць тэрмін пазбаўлення правоў наведвання Бібліятэкі для экскурсантаў, якія парушылі Правілы;
    21.6 патрабаваць ад экскурсантаў пакінуць памяшканне Бібліятэкі ў выпадку невыканання этычных норм і правілаў паводзін у Бібліятэцы.

  7. АБАВЯЗКІ БІБЛІЯТЭКІ

    22. Бібліятэка абавязана:
    22.1 абслугоўваць наведвальнікаў згодна Правілам экскурсійнага абслугоўвання;
    22.2 забяспечваць высокі ўзровень экскурсійнага абслугоўвання наведвальнікаў;
    22.3 інфармаваць наведвальнікаў аб:
             відах паслуг, якія аказвае Бібліятэка;
             дапаўненнях і змяненнях, якія ўносяцца ў Правілы;
             змяненнях у рэжыме работы Бібліятэкі.